草山熱人ê銀河，佮銀河影像處理ê技術

本文使用漢羅台文書寫。（Gimini 的華文譯文我放在後面）

8/4 (咱人七月初一)

下晡天氣誠好，朋友 Jeremy 傳 messenger teh 問有欲上山去翕星無，ia 閣阮兜準高中生捌共我提起伊考完試踮佇厝--ê閒(îng)閒仔，欲缀我去看星 [頂1擺伊綴我看星是去七星山頂翕Neowise 大彗星(長尾星)時，彼是4年前ê代誌矣(a)]。就按呢天倚欲黯時我著共家私攢攢--ê，招伊作夥來草山看星。

熱人ê日頭誠長，七點捅到大屯山鞍部，天色閣ia 紺青仔紺青，我連鞭著共赤道儀(tshik-tō-gî)佮望眼鏡(bōng-gán-kiànn，也有人講“召鏡”，tiàu-kiànn) 組立起來，對好極軸（ki̍k-ti̍k）。紲落來閣等一睏仔，到欲倚8點彼跤兜仔天色才完全黯落下。無偌久Jemery 嘛到位矣。

我調整好揣星鏡，對準暗空，徙對離織女(Tsit-lú)無偌hn̄g ê 環狀星雲（M57)，雖然

我紮ê望眼鏡是 Takahashi FC-76，鏡面干焦7公分小 ê古董，但是下-昏-暗 (ing-àm)ê 透明度袂䆀，二十倍就看會著伊，換較懸ê倍數著看會出伊甜箍仔ê外形，誠媠，干焦差佇咱人ê目睭對足黯ê色彩無敏感，看起來干焦白白殕殕。不而過咱想著這絲仔光線是按幾千光年外遐hn̄g ê所在飛過來，飛入我ê目睭，我著感覺誠奧妙，誠珍貴。

等Jemery ê設備組好開始自動翕相，我便招伊佮準高中生鬥陣來用目睭欣賞遮ê奧妙。

紲落去我閣揣佇人馬座茶鈷附近、銀河內ê 礁湖星雲(M8)，ia 有仝佇附近，目睭看敢若一支雞翅(看著 lo 腹肚枵矣) ê Omega 星雲（M7）予in 看，這2个星雲著無M57遐明顯，所以我有加掛濾鏡，無經驗ê人嘛是足簡單著看會出來。

差不多十點外，土星已經按東爿ê山崙仔頂升起來不止--a 懸，用200倍看起土星干焦一粒仔囝niā，目鏡（bo̍k-kiànn）裡ê土星（Thóo-tshinn）誠在攏袂幌(hàinn)，表示 Ing-àm ê 視寧度（sī-lîng-tōo）也誠讚。因為這站仔土星ê腹肚邊拄好向對地球，所以咱這馬看伊ê環煞變一條線，敢若一枝竹籤，土星袂輸是予攕迵過ê魚丸仔，真古錐，真心適。

相機tshāi起來，翕幾張a銀河(河溪)，銀河略略仔浮出來見人。欲翻點ê時台北ê電火光害攏黯落來矣。

銀河ê中心段。(40秒曝光)

銀河佮夏季大三角。佇相片ê左手爿閣會使看著大、小熊座。(50秒曝光)

150秒曝光

佇草山翕銀河佮影像(iánn-siōng)處理ê辦法


郊山ê暗時受著城市ê光污染影響，翕相時孤1張ê曝光時間袂使傷長，若快門時間傷長，歸張相片著會反白。


天氣好ê時陣，佇鞍部向南爿亦著是市區ê方向翕，孤張大約仔會使曝30秒、40秒，北爿會使曝到1分鐘左右（因為光害較小）。若欲倚翻點，市區ê光污染會較小，天色會加黯足濟，這時著會使用更加長ê快門時間。


但是愛注意ê是，長時間ê星空曝光須要共相機裝佇追蹤天球運轉ê器材--攝星儀頂面，或者是學我，使用Pentax ê 有ASTROTRACER 功能e翕相機，若無相片頂面ê星攏會拖出一條線。

有ASTROTRACER 功能，會徙振動CMOS去追蹤天球運轉 ê Pentax 數位相機

佇郊山翕銀河閣有1个鋩角，因為光害ê關係，拄翕出來ê銀河影像會霧霧袂講真明顯(圖1)，著愛閣經過一種號作“平場（pîng-tshiâng） 處理”ê影像處理，紲落去閣調整一下仔色階(curve)，銀河才會清楚(圖2)。


平場處理我是使用一个叫作SiriL ê免費軟體，伊ê Background Extraction 功能會當共光害ê影響減掉佮共鏡頭內ê四箍圍仔ê減光效應校予平。

然後使用伊ê自動搝色調ê功能來增加影像ê對比（嘛會使家己調整），著愛處理到這个坎站，銀河才會清楚(圖3)。

最後，我個人做平場校正(kàu-tsìng)時並没校正地景ê部分 (因為我感覺連地景作夥校正ê效果較䆀)，地景ê部份我是用原本翕出來，猶未經過處理ê相片(較光)，佮平場處理過ê相片(較暗)，混合作 HDR （嘛會使用3張以上來混合）。混合時會使利用Photoshop 抑是免費ê Gimp 這款軟體ê“Mask”遮枋ê功能，去共原始彼張ê夜空ê部份崁掉，只留落來地景ê部份(圖4)，將伊佮處理過ê銀河影像混合。

幾點秘訣

1.個人處理這種帶地景ê星空相片時，攏會先佮翕相機翕出來ê 原始RAW 檔轉作tiff 規格ê 檔案（使用相機設定ê白平衡），才去作影像ê處理。你若用RAW檔去處理，色緻會怪怪偏青色，雖罔會使校正色彩亦是袂自然（直接使用RAW ê時機是佇處理天體目標ê 影像時）。

2.使用SiriL ê Background Extraction 

佇相片中設定參考點(顯示作四角形紅框，軟體會用in 所在位置ê 光度來計算歸張圖e光度變化，然後共無平均ê光度減掉，我個人ê建議佇設定ê時陣著閃過銀河，按呢計算起來會較準。另外嘛閃過地景的部份，mài  校正地景，校正地景會共地景光度嘛變平，但是我感覺效果無好，不如家己用原始ê相片中ê地景來混合。

3.佇 Gimp內製作 layer masks(圖層ê遮枋)

因為長時間ê曝光了後夜空會比地景光足濟--ê，所以使用影像編輯軟體比如 Photoshop 或者是Gimp ê 魔術棍仔工具去點夜空的部份(將選取方法設作加法，然後用魔術棍仔對夜空四界攏共點點ê)著會使共歸个夜空攏箍起來，若有星落勾，著家己手動用鈕仔工具共所有落勾ê星攏箍入選取ê區域。然後才閣用反相工具(Select->Invert)，選取e區域著會變成地景ê部分，最後，用羽化工具(Select->Feather)來 si-á-geh 伊ê邊緣(pian-iân )。

紲落來著會使揤遮枋ê功能來製作出遮枋。若有需要，閣調整遮枋ê懸度到上自然、效果上好ê位置。

PS.

1.從現在開始我想多使用我從小就熟悉的母語--台灣台語來書寫，想要找回用台語思考的感覺，台語比較古老，個人覺得多形象的思考，現在的華文則多抽象。不過不要擔心看不懂，我發現丟給生成式AI Gemini 它看得懂漢羅，只是有少數的詞彙會翻錯。譬如“熱天”是夏天，不是熱情。“相機 tshāi 起來” 是將相機立起來即架起相機的意思，“翻點”是過午夜12點……

用字請參考教育部公布的台灣閩南語網路字典。

Gemini的翻譯

2. Gimp V2.99.18 測試版本（終於）有初步的非破壞性調整圖層的功能了！