秋夜觀星 (2)秋天ê銀河

 秋夜觀星 (2)秋天ê銀河

DA10-17@10 F3.5 ISO1600

Pentax K3II ASTROTRACER 190秒孤張

原圖地景HDR處理

9/1

Ehng-暗我又擱來鞍部，雖罔嘛有紮望眼鏡，毋擱今旦主要是欲起來翕秋天ê銀河。 

鞍部會使翕銀河這點我是敢拍胸坎掛保證，加講--ê，因為我已經佇遮翕十外冬矣（笑），毋擱佇遮嘛會當用目睭看著銀河，可能較少人知影。

若欲佇遮看著銀河，除了愛知影銀河昇起來ê時間(現代手機仔ê星圖誠方便，會當查任何日子、時間ê星天)這个基本ê常識，嘛要會曉看季節，因為地球ná自轉ná踅太陽公轉，而且公轉平面佮銀河ê平面 uān-nā 有1个角度，就按呢四季看著ê銀河毋旦無仝向，伊升起來ê時間佮角度嘛無仝。另外，著是要熟識鞍部ê光害特徵。

像今夜，正正著時，透明度也誠好，倚翻點ê天頂ê SQM暗度差不多到 20矣，銀河盤面已經反對天頂往北爿去矣，遐正是草山光污染上低ê天區，攑頭影著淺淺仔ê秋季銀河自東北伐過天頂到西爿流落瀉去大屯山⋯⋯慢且，應該反過來講，是自大屯山流入小觀音山。薄薄仔經絲ê 1逝銀河。

比起熱人ê銀河（我敢講有誠大部份ê人講著銀河時心內想著ê干焦是天蠍附近這段），秋冬ê銀河更加投我ê緣，雖罔無熱人ê銀河彼樣向人馬座方向看起遐爾光爍爍，像1位明星吸引眾人目神 。秋天ê銀河生作無仝，伊佮這个季節嶄然密合，予人感覺清涼心爽，佮熱天ê銀河袂輸是性地完全對反ê 2个兄弟(姊妹)，像節氣。

銀河生作無仝，彼是因為咱佇地球，佇銀河系ê所在位置看出去ê方向變化ê關係。

咱ê銀河系是1个 SB星系 (Barred spiral galaxy) ，'bar' 是講佇星系中央有足濟天星khêh 到密喌喌，敢若1支棍仔。銀河系ê bar ê中央有1个袂輸膨疱 ê phok 出來ê 1球，號作 'bulge'，遐著是銀河系ê中心。

秋夜觀星 (1)眼視ê宇宙

 秋夜觀星(tshinn) 

(1)

8/31

看氣象預報，雖罔meteblue 表示 ehng-暗(下昏暗) 鞍部會有薄薄ê低雲，不而過根據過去十幾冬佇頂仔觀星ê經驗，秋冬ê季節，若彼个雲懸度ê預報圖共雲層繪佇差不多700至1000公尺ê跤兜(彼个圖ê格仔真粗)（鞍部海拔828公尺），著有誠大ê機會到時陣會沉落去800公尺以下，因為鞍部ê海拔是828公尺，所以頂頭天清星彩ê機率誠懸。

下晡，攑頭望向草山方向，除了有1寡仔雲猶袂散，天氣大概仔袂䆀。開始順序準備觀星ê器材，因為攏已經模組化，所以真緊著攢好勢。共 ehng-晚 欲使用ê望遠鏡Takahashi FC-76收入攜行皮箱，將赤道儀 Pentax MS-3 本體佮配重先囥入去機車後斗，紲落位電子防潮箱內揀幾粒適合ê目鏡到塑膠盒仔內。

猶擱有，頭燈愛紮會使切去紅光ê(因為紅光是佇黑暗中較袂刺激眼睛ê波長，黑暗中人ê目睭對這个波段較無敏感[1])，若人ê目睭去予強光刺激到，欲擱再恢復到會當在佇黑暗中看見上暗ê目標ê能力，著擱等二、三十分鐘矣(這个習慣黑暗ê過程叫作人眼 ê dark adaptation [2])。

最後，為著ehng 暗計劃欲看ê，佇翻點前後佇天頂附近ê天鵝座目標，我挑工佇出門前擱在FC-76 ê 遮光罩仔頂戮空 thap-牙，共QuickFinder 揣星器鎖起哩。擱加上我進前買ê，保護跤頭趺 ê 厚ê墊仔加持，按呢我著可以揣天頂ê目標袂去tsuāinn 著頷頸脖，跪咧虔誠瞻仰（笑）。

拄到鞍部ê時，高空ê雲層猶未散了，我代先對好極軸，據在赤道儀家己佇遐紡，先來泡一碗泡糜食看覓，我第一擺食這種佮泡麵相像，會使直接用滾水泡ê糜，啖一喙感覺誠讚（後改我欲買豬骨口味ê紮來）。

大約仔是九點時，雲攏散矣，夜空诚清氣，透明度佮視寧度攏袂䆀，嘿!今夜無月娘來插花仔。

因為星況所賜，我雖罔干焦使用7.6 cent ê 細支折射鏡，佮LP2(OIII+Hb)濾鏡鬥搭眼視觀測，嘛完全無困難ê辨識出幾个我過去捌認為著愛用10 cent 以上ê口徑才會當佇遮（鞍部，光污染等級Bortle 5）看會著ê星雲。

啞鈴（à-lêng）星雲(M27) 誠光，用60倍時完全免用著濾鏡就看會出來。伊ê大小（直徑）大約有3光年，離咱地球有1400光年。用目睭看煞、素描繪好，我嘛用手機仔轉接去目鏡頂面，用10秒翕出啞鈴星雲ê美麗身影。

頂回觀測過ê環狀星雲(M57，嘛號作手指星雲)也是離地球差不多欲1400光年，但是伊ê直徑著加細真濟，量其約干焦0.6光年，所以目睭欲觀察著愛使用較懸ê倍率，才較好欣賞。

草山熱人ê銀河，佮銀河影像處理ê技術

本文使用漢羅台文書寫。（Gimini 的華文譯文我放在後面）

8/4 (咱人七月初一)

下晡天氣誠好，朋友 Jeremy 傳 messenger teh 問有欲上山去翕星無，ia 閣阮兜準高中生捌共我提起伊考完試踮佇厝--ê閒(îng)閒仔，欲缀我去看星 [頂1擺伊綴我看星是去七星山頂翕Neowise 大彗星(長尾星)時，彼是4年前ê代誌矣(a)]。就按呢天倚欲黯時我著共家私攢攢--ê，招伊作夥來草山看星。

熱人ê日頭誠長，七點捅到大屯山鞍部，天色閣ia 紺青仔紺青，我連鞭著共赤道儀(tshik-tō-gî)佮望眼鏡(bōng-gán-kiànn，也有人講“召鏡”，tiàu-kiànn) 組立起來，對好極軸（ki̍k-ti̍k）。紲落來閣等一睏仔，到欲倚8點彼跤兜仔天色才完全黯落下。無偌久Jemery 嘛到位矣。

我調整好揣星鏡，對準暗空，徙對離織女(Tsit-lú)無偌hn̄g ê 環狀星雲（M57)，雖然

我紮ê望眼鏡是 Takahashi FC-76，鏡面干焦7公分小 ê古董，但是下-昏-暗 (ing-àm)ê 透明度袂䆀，二十倍就看會著伊，換較懸ê倍數著看會出伊甜箍仔ê外形，誠媠，干焦差佇咱人ê目睭對足黯ê色彩無敏感，看起來干焦白白殕殕。不而過咱想著這絲仔光線是按幾千光年外遐hn̄g ê所在飛過來，飛入我ê目睭，我著感覺誠奧妙，誠珍貴。

等Jemery ê設備組好開始自動翕相，我便招伊佮準高中生鬥陣來用目睭欣賞遮ê奧妙。

紲落去我閣揣佇人馬座茶鈷附近、銀河內ê 礁湖星雲(M8)，ia 有仝佇附近，目睭看敢若一支雞翅(看著 lo 腹肚枵矣) ê Omega 星雲（M7）予in 看，這2个星雲著無M57遐明顯，所以我有加掛濾鏡，無經驗ê人嘛是足簡單著看會出來。

差不多十點外，土星已經按東爿ê山崙仔頂升起來不止--a 懸，用200倍看起土星干焦一粒仔囝niā，目鏡（bo̍k-kiànn）裡ê土星（Thóo-tshinn）誠在攏袂幌(hàinn)，表示 Ing-àm ê 視寧度（sī-lîng-tōo）也誠讚。因為這站仔土星ê腹肚邊拄好向對地球，所以咱這馬看伊ê環煞變一條線，敢若一枝竹籤，土星袂輸是予攕迵過ê魚丸仔，真古錐，真心適。

相機tshāi起來，翕幾張a銀河(河溪)，銀河略略仔浮出來見人。欲翻點ê時台北ê電火光害攏黯落來矣。