春天的星系漫遊 III （用手機仔接目鏡做擴大攝影來輔助調整 μ-210 的光軸）

台文系列 9 

3/25

(利用有wifi傳輸功能的cam佮iPad來輔助校正光軸請参考這篇: https://astrotracer.blogspot.com/2018/05/Imaging-Jupiter.html)

今仔大概是這波好天氣的上尾工，雖然講雲會開始濟起來，毋擱下昏暗想欲來做1个試驗，想欲用手機仔來接望遠鏡的目鏡做擴大攝影，來輔助校正 μ-210的光軸。校光軸只要找有星著會使，所以受天氣的影響較小。

若這个想法會當實現，著會比用cam 擱較直接，免擱加紮一台cam，碇星的繞射環影像的顯示嘛袂因為傳輸有延遲。

騎車到鞍部，組立好設備了後，有2位星友嘛騎車經過，我先𤆬 in 欣賞M42星雲一睏仔，然後我才開始校正我的 μ-210的光軸。

先將手機仔挾佇轉接架仔面頂，然後提起XW40目鏡，將伊的目遮轉落下，才佮手機架子鬥起佇目鏡頂。然後用紅色頭燈位目鏡另外一頭炤，確定、調整手機仔的鏡頭有對正。

然後我先用低倍率（XW40）將望眼鏡對準拄過頭殼頂的雙生仔座的上光的彼粒星，紲落將彼粒星徒入目鏡視野的正中央，換XW20擱調整視野將碇星徒入正中央，最後換已經裝好手機仔的XW5，打開手機仔的相機，確定碇星佇正中央，最後調整對焦，挑工予星點失焦，變成一輪圓圓的繞射環，按呢著準備好，會使進行下一个動作一一調整次鏡的螺絲母來校正光軸。

先將天頂鏡捘予手機仔的螢幕對準我徛的這爿，按呢較方便每捘一粒螺絲了後翻頭去看繞射環的變化。

捘開M-210鏡筒頭前次鏡調整座的蓋，會看著三粒圓頭的內六角螺絲，先捘冗其中二粒，大概仔攏捘一輾著有夠 (袂使一睏三粒攏捘傷冗)。

捘絚抑是捘冗半輾繞射環的變化著會誠明顯，然後一改調整一粒，看仝心圓是偏叨一爿，著會知影每一粒對應的變化(方向)。

紲落去三粒螺絲輪流調整，一直到繞射環內的仝心圓攏對中央對媵(tuì-thīn)。焦內(Intra-focol，準焦點比碇星近)、焦外(Extra-focol，準焦點比碇星遠) 2个的繞射環攏愛確定。

works like a charm! 手機仔的相機顯示的繞射環誠光誠清楚，嘛無延遲。用480倍目鏡佇調整光軸，捘螺絲半輾繞射環嘛罕得去予走出目鏡視野(免重對碇星)，誠順利著共光軸調好。

調好光軸，才想著猶未食暗頓，泡麵當作宵夜，十一點外，將望遠鏡徒去獵狗座看M63，夜空內的日頭花，這个星系是我個人上佮意的星系之一。不而過下昏暗的透明度無算好，日頭花殕殕仔，無像透明度好的時會當看著誠明顯的花瓣（pān）結構，若天頂有風吹振動氣流，花瓣有時嘛會閃爍，袂輸伊嘛隨風佇跳舞。

畫好日頭花，紲落來想欲徒去獅仔座，欣賞M65, M66佮 NGC3628這三粒星系。獅仔座當佇頭殼頂，佇θ Leo邊仔爾，所以免幾步著揣著，3个星系拄好會使囥入仝1个視野內。M65, M66 真簡單著看著，足成兩粒一嘴小煙腸，曷若是NGC 3628 愛稍繩較久才會看著袂輸一節袂輸 Hot-Dog，害呀，看到我腹肚又擱枵矣。

這幾工用的配件

目鏡： Pentax XW40, XW20, XW10, XW5, XL ZOOM 8-24.  Takahashi LE-30

天頂鏡 : Baader 2" ClickLock Diagonal Mirror 

濾鏡 ： 2" & 1.25" OAKS LP-2 (OIII+Hb) filter