秋夜觀星 (2)秋天ê銀河

 秋夜觀星 (2)秋天ê銀河

DA10-17@10 F3.5 ISO1600

Pentax K3II ASTROTRACER 190秒孤張

原圖地景HDR處理

9/1

Ehng-暗我又擱來鞍部，雖罔嘛有紮望眼鏡，毋擱今旦主要是欲起來翕秋天ê銀河。 

鞍部會使翕銀河這點我是敢拍胸坎掛保證，加講--ê，因為我已經佇遮翕十外冬矣（笑），毋擱佇遮嘛會當用目睭看著銀河，可能較少人知影。

若欲佇遮看著銀河，除了愛知影銀河昇起來ê時間(現代手機仔ê星圖誠方便，會當查任何日子、時間ê星天)這个基本ê常識，嘛要會曉看季節，因為地球ná自轉ná踅太陽公轉，而且公轉平面佮銀河ê平面 uān-nā 有1个角度，就按呢四季看著ê銀河毋旦無仝向，伊升起來ê時間佮角度嘛無仝。另外，著是要熟識鞍部ê光害特徵。

像今夜，正正著時，透明度也誠好，倚翻點ê天頂ê SQM暗度差不多到 20矣，銀河盤面已經反對天頂往北爿去矣，遐正是草山光污染上低ê天區，攑頭影著淺淺仔ê秋季銀河自東北伐過天頂到西爿流落瀉去大屯山⋯⋯慢且，應該反過來講，是自大屯山流入小觀音山。薄薄仔經絲ê 1逝銀河。

比起熱人ê銀河（我敢講有誠大部份ê人講著銀河時心內想著ê干焦是天蠍附近這段），秋冬ê銀河更加投我ê緣，雖罔無熱人ê銀河彼樣向人馬座方向看起遐爾光爍爍，像1位明星吸引眾人目神 。秋天ê銀河生作無仝，伊佮這个季節嶄然密合，予人感覺清涼心爽，佮熱天ê銀河袂輸是性地完全對反ê 2个兄弟(姊妹)，像節氣。

銀河生作無仝，彼是因為咱佇地球，佇銀河系ê所在位置看出去ê方向變化ê關係。

咱ê銀河系是1个 SB星系 (Barred spiral galaxy) ，'bar' 是講佇星系中央有足濟天星khêh 到密喌喌，敢若1支棍仔。銀河系ê bar ê中央有1个袂輸膨疱 ê phok 出來ê 1球，號作 'bulge'，遐著是銀河系ê中心。

敢若位 bar ê 二邊頭伸出ê 'spiral' 嘛是天星集中ê所在，這1條1條捲螺仔水模樣ê叫做'arms'(手股)，我暫且叫伊旋股(suân-kóo)[1]，有旋股ê星系位彼頂仔抑或下面看起來誠像是1座風車，嘛像 thak-khooh ê跤捲作捲螺仔旋(tsn̄g) ê模樣，實在古錐美麗。

咱ê太陽系（包括地球）位在離銀河中心欲倚 8pc(parsec, 1个pc 大約是3.3光年)，也著是佇二萬六千光年遠ê 旋股內面，䢢拄䢢欲倚銀河系半徑(15pc)ê 一半。

銀河系有兩條上明顯、上粗上洘厚ê，khêh 上濟星佮雲氣等物質ê 旋股，1股叫做 'Scutum–Cêntaurus'，這名實在是落落長，無怪"The Milk Way"ê 作者 MOIYA McTIER 簡單叫伊 'Scoot'[2]，另外1股叫 'Perseus'(著是神話中彼位騎會飛ê馬去救公主ê 少年英雄)，旋股攏是用星座ê名來號--ê，其他擱有位這兩股擱分出去ê，其中佇 in 兩股中間有1股較薄ê叫 'Carina–Sagittarius'，名嘛誠長，我暫且叫伊 khá-sáng(CarSan) , 呀咱ê太陽系是khá-sáng擱再必叉出去ê 小小1段叫 'Orion' 分枝(Orion 著是神話中ê彼个拍獵人 ê 名，這股也稱作 Orion-Cygnus) ê內面。

這張圖ê來源：NASA/JPL-Caltech/ESO/R. Hurt 

過去足濟研究天文ê人攏誠好玄是按怎星系ê旋股無愈絞愈絚，最後絞作1球咧？後來有1个理論講是因為in之所以是螺仔旋ê模樣是1種叫作密度波ê 背景造成--ê，並毋是因為天星等等物質ê重力手牽手相搝造成ê股，這誠專業，共想講天星經過密度較懸ê所在袂輸是經過捷運的電扶梯，欲徛去進前逐家攏慢落來kheh作1堆，送出去ê時人人腳步又擱變緊。

這馬是秋天，眼前--位鞍部[4]，台灣，地球ê北爿--看出去ê銀河是佇 Orion 旋股內向銀河系ê外口看出去，主要看著猶是咱自己ê Orion 股（有北美洲星雲彼股ê銀河其實是佮咱佇仝 1 股，仝 tsuā--ê。毋擱北美洲星雲離咱有2600光年，所以這个短短ê旋股其實不止仔長）。


另外向天后宮(x)……毋對，是仙后座 ê方向看去，會使微微仔看著1部份ê 彼少年英雄 P旋股。是按怎我會遮確定彼逝ê銀河內有部分是 P 旋股哩? 我是透過我佇鞍部遮十外年來用細支望眼鏡目視觀測過ê 300捅个深空天體 ê記錄[3]去了解 ê，知影in ê距離了後就知影有幾个目標是佇P 旋股內，其中ê英仙座雙星團，天氣好ê秋夜干焦用目睭，免望眼鏡亦看會著in 1簇霧霧。

呀若是熱人時，咱是看對銀河系中心彼爿。

(這天是熱天時翕ê)

彼時咱看著ê銀河自南至北先是 khá-sáng，然後是咱Orion 旋股按伊分出來ê所在，然後是接來咱ê Orion 旋股。

若想欲將銀河系ê旋股佮親目看著ê夜空銀河對照，咱人著愛頭向北、跤向南安呢䖙佇塗跤草埔看向夜空，這時咱看著ê銀河方向著會佮Skysafari /wiki 頂銀河系圖面ê旋股方向仝款。

秋季ê銀河是我認為角度上好翕ê。佇秋暝差不多欲倚翻點時，彼个熱人光炎炎ê，覕佇 khá-sáng旋股後(伊後面擱有其他旋股)足遠ê銀河中心會沈入大屯山後，然後因為地球自轉ê角度關係，銀河ê盤面會寬寬仔反向北爿，𫝛時本來佇東北ê天鵝座佮夏季大三角嘛會踅去西北爿，這時若用我 DA10-17 魚眼鏡頭ê10mm 敆我ê K3II 相機，只要1張就強欲會使共大屯山流出迵過天頂，流入小觀音山ê歸逝銀河(Orion + Pêrsêus 旋股)攏翕入去，而且因為東西二爿夜空ê光度是差不多--ê，假使欲翕濟張來接較闊ê景，曝光時間會當用1種設定較簡單。袂像翕熱天ê銀河時愛注意鞍部南爿台北市方向ê光污染，伊比北爿懸欲2倍外(差不多1个星等)，愛調整曝光ê差別。

繩(tsîn) 星空愈久，目神愈會深入到太空ê深處，愈會感受著宇宙若無底深坑，無墘之海，紲落來雄雄發覺家己所徛ê所在干焦是佇無底止宇宙中ê 1粒塗沙，只是坱埃。

我徛在這个方寸之地，是1卑賤ê生物面對四箍圍仔奒(hai)大ê未知烏暗（論真講來人類目前干焦知影宇宙成份ê 5%爾爾），讚嘆甚至感覺驚惶，彼口無底ê井ê深坑，這馬ê我感受著1个人佇宇宙中ê孤單。烏暗ê深處敢有其他智慧生物存在？伊敢亦仝款體會我ê感受？

我拍開數位相機電源，校正了GPS，用 ASTROTRACêR 翕了幾張記錄佮銀河，徙各種ê角度，擱翕，其實佇長時間曝光了後ê影像頂，秋天ê銀河嘛非常好看，燦爛，我會使保證伊是「烏矸仔貯豆油」。 

大約兩點時我開始款裝備矣，準備下山轉厝去睏，這2暝下山ê時間攏差不多，毋是少年郎矣愛較養生一下，儘量莫因為星況好著貪心看歸暝。

兩分半至三分鐘ê曝光，加上背景校正後，這影像強強像是位１个無大氣消光ê外星地面所見ê太空，看著家己被充滿夜空密密是ê天星包圍。感受到強烈ê宇宙感ê我，佇銀河ê Orion 旋股內，迵過密喌喌天星，向Orion彎曲到遠遠ê所在、以為是對面但其實是仝股ê銀河金金相，我知影較遠向小觀音山垂落ê部分是 Perseus 旋股ê銀河。 

------

注：

[1]我稱呼伊作「旋股」，無照華文叫「旋臂」，是因為希望咱讀、寫台文ê時陣嘛是愛用台文思考，莫經過華文轉譯。

[2]“Thê Milky Way”是1本誠心適ê 英文“小說”，作者以第1人稱擬人法，位銀河系ê角度來介紹伊家己ê“性命歷程”所見所聞，包括人類傳說有關伊ê神話，伊ê厝邊隔壁，伊家己ê構成，一直到宇宙佮人類ê生存問題。雖然是小說，毋擱內面有誠濟誠專業ê天文物理資訊，舉幾个裡面出現ê詞彙譬如 'BAO (baryonic acoustic oscillation)'，Rubin ê 'rotation curve', 'wave of density', 咱銀河系中央ê 'black hole - Sarge' , 'WIMPs', 'DES(dark energy survey)'…………你著知影伊其實是掛羊頭賣狗肉，實際上是1本較深ê介紹天文物理ê入門書，談論恆星亦談論星系佮宇宙論，厲害ê所在是作者干焦用小說ê敘述方式來介紹當代人類所理解(佮未知)ê宇宙，冊內無半張圖表佮半逝公式（有插畫，毋擱干焦有1張勉強會使算是有直接ê說明性），是1本趣味又擱知性ê小說。

[3] 咱天文人講ê 細支是指口徑8"以內。

我ê〈大屯鞍部 300 个深空天體眼視素描〉:

https://xn--astrotracr-u7a.blogspot.com/p/331-yangmingshan-suburban-331-dêêp-sky.html

根據個人過去佇遮觀星十外年ê累積記錄，用8"望眼鏡至少會使觀賞著超過三百个深空天體。就台北市ê郊山來講算是相當袂䆀(bái)的觀星地點。 

你若有使用 SkySafari 這个手機仔ê星圖軟體，會使將你觀測清單內ê目標攏顯示器佇銀河系ê視圖頂(俯視圖+側視圖)，按呢會更加清楚in ê位置。

[4]鞍部位在草山鹿角坑保護區ê西南角，巴拉卡公路邊仔（北爿），北爿小觀音山佮西南面大屯山主峰相尋ê山坪停車場。南爿有茂密ê樹林，所以差不多會使講四箍圍仔山跤ê光污染若是有直接射向這爿ê攏共閘掉矣，遮ê光害比山跤小誠濟（大約仔是1/6）。

2024/09/25 初稿