秋夜觀星 (2)秋天的銀河

台文系列 3 

秋夜觀星 (2)秋天的銀河

DA10-17@10 F3.5 ISO1600

Pentax K3II ASTROTRACER 190秒孤張

原圖地景HDR處理

9/1

Ehng-暗我又擱來鞍部，雖罔嘛有紮望眼鏡，毋擱今旦主要是欲起來翕秋天的銀河。 

鞍部會使翕銀河這點我是敢拍胸坎掛保證，加講--ê，因為我已經佇遮翕十外冬矣（笑），毋擱佇遮嘛會當用目睭看著銀河，可能較少人知影。

若欲佇遮看著銀河，除了愛知影銀河昇起來的時間(現代手機仔的星圖誠方便，會當查任何日子、時間ê星天)這个基本的常識，嘛要會曉看季節，因為地球ná自轉ná踅太陽公轉，而且公轉平面佮銀河的平面 uān-nā 有1个角度，就按呢四季看著的銀河毋旦無仝向，伊升起來的時間佮角度嘛無仝。另外，著是要熟識鞍部的光害特徵。

像今夜，正正著時，透明度也誠好，倚翻點的天頂的 SQM暗度差不多到 20矣，銀河盤面已經反對天頂往北爿去矣，遐正是草山光污染上低的天區，攑頭影著淺淺仔的秋季銀河自東北伐過天頂到西爿流落瀉去大屯山⋯⋯慢且，應該反過來講，是自大屯山流入小觀音山。薄薄仔經絲的 1逝銀河。

比起熱人的銀河（我敢講有誠大部份的人講著銀河時心內想著的干焦是天蠍附近這段），秋冬的銀河更加投我的緣，雖罔無熱人的銀河彼樣向人馬座方向看起遐爾光爍爍，像1位明星吸引眾人目神 。秋天的銀河生作無仝，伊佮這个季節嶄然密合，予人感覺清涼心爽，佮熱天的銀河袂輸是性地完全對反的 2个兄弟(姊妹)，像節氣。

銀河生作無仝，彼是因為咱佇地球，佇銀河系的所在位置看出去的方向變化的關係。

咱的銀河系是1个 SB星系 (Barred spiral galaxy) ，'bar' 是講佇星系中央有足濟天星khêh 到密喌喌，敢若1支棍仔。銀河系的 bar 的中央有1个袂輸膨疱 的 phok 出來的 1球，號作 'bulge'，遐著是銀河系的中心。

秋夜觀星 (1)眼視的宇宙

台文系列 2 

秋夜觀星(tshinn) 

(1)

8/31

看氣象預報，雖罔meteblue 表示 ehng-暗(下昏暗) 鞍部會有薄薄的低雲，不而過根據過去十幾冬佇頂仔觀星的經驗，秋冬的季節，若彼个雲懸度的預報圖共雲層繪佇差不多700至1000公尺的跤兜(彼个圖的格仔真粗)（鞍部海拔828公尺），著有誠大的機會到時陣會沉落去800公尺以下，因為鞍部的海拔是828公尺，所以頂頭天清星彩的機率誠懸。

下晡，攑頭望向草山方向，除了有1寡仔雲猶袂散，天氣大概仔袂䆀。開始順序準備觀星的器材，因為攏已經模組化，所以真緊著攢好勢。共 ehng-晚 欲使用的望遠鏡Takahashi FC-76收入攜行皮箱，將赤道儀 Pentax MS-3 本體佮配重先囥入去機車後斗，紲落位電子防潮箱內揀幾粒適合的目鏡到塑膠盒仔內。

猶擱有，頭燈愛紮會使切去紅光的(因為紅光是佇黑暗中較袂刺激眼睛的波長，黑暗中人的目睭對這个波段較無敏感[1])，若人的目睭去予強光刺激到，欲擱再恢復到會當在佇黑暗中看見上暗的目標的能力，著擱等二、三十分鐘矣(這个習慣黑暗的過程叫作人眼的 dark adaptation [2])。

最後，為著ehng 暗計劃欲看的，佇翻點前後佇天頂附近的天鵝座目標，我挑工佇出門前擱在FC-76 的遮光罩仔頂戮空 thap-牙，共QuickFinder 揣星器鎖起哩。擱加上我進前買的，保護跤頭趺 的厚的墊仔加持，按呢我著可以揣天頂的目標袂去tsuāinn 著頷頸脖，跪咧虔誠瞻仰（笑）。

拄到鞍部的時，高空的雲層猶未散了，我代先對好極軸，據在赤道儀家己佇遐紡，先來泡一碗泡糜食看覓，我第一擺食這種佮泡麵相像，會使直接用滾水泡的糜，啖一喙感覺誠讚（後改我欲買豬骨口味的紮來）。

大約仔是九點時，雲攏散矣，夜空诚清氣，透明度佮視寧度攏袂䆀，嘿!今夜無月娘來插花仔。

因為星況所賜，我雖罔干焦使用7.6 cent 的細支折射鏡，佮LP2(OIII+Hb)濾鏡鬥搭眼視觀測，嘛完全無困難的辨識出幾个我過去捌認為著愛用10 cent 以上的口徑才會當佇遮（鞍部，光污染等級Bortle 5）看會著的星雲。

啞鈴（à-lêng）星雲(M27) 誠光，用60倍時完全免用著濾鏡就看會出來。伊的大小（直徑）大約有3光年，離咱地球有1400光年。用目睭看煞、素描繪好，我嘛用手機仔轉接去目鏡頂面，用10秒翕出啞鈴星雲的美麗身影。

頂回觀測過的環狀星雲(M57，嘛號作手指星雲)也是離地球差不多欲1400光年，但是伊的直徑著加細真濟，量其約干焦0.6光年，所以目睭欲觀察著愛使用較懸的倍率，才較好欣賞。